Ish-Kryeministri Sali Berisha deklaroi sot se Komisioni i Rithemelimit i ka hequr mbështetjen Enkelejd Alibeaj si Kryetar i Grupit Parlamentar të PD. Berisha tha se ky qëndrim ka të bëjë me faktin se ai bëri lojën e Edi Ramës duke apeluar vendimin e 25 marsit, që njihte Kuvendin e 11 dhjetorit 2021, dhe Komisionin e Rithemelimit si të vetmen strukturë drejtuese të PD.
Në anën tjetër, Enkelejd Alibeaj në një prononcim për mediat tha ankimimi u bë pasi vendimi i 25 marsit ishte në shkelje të ligjit. Ai tha se nuk ka ndërmend të tërhiqet nga ky ankimim dhe do të presë deri në fund vendimin e Gjykatës.
Pyetje: A do tërhiqeni nga apelimi?
Alibeaj: Kam qenë këtu para dy javësh, ditën që ishte një vendim i marrë në mënyrë të paligjshme, i marrë në konflikt interesi i deklaruar nga vetë gjyqtari dhe deklarova që do të bëj ankimim. Ankimimi besoj se është e drejtë Kushtetuese, unë besoj se ankimi është një mjet që e zgjidh çështjen në gjykatë. Unë besoj që një parti e cila synon qeverisjen dhe qëndron tek vlerat Kushtetuese kurrsesi nuk duhet të thotë mos-respektojmë gjykatat. Kur të flasin gjykatat me vendim të formës së prerë unë dhe gjithë të tjerët do të heshtim, deri në atë moment kemi të gjitha hapësirat për të bashkuar demokratët. Vajtja në gjykata nuk kufizon eksplorimin e mundësive për të gjetur bashkimin. Gjejmë bashkimin këtu, nuk ka nevojë për gjykatë.
