Ish-Kryeministri Sali Berisha tha se vlerësonte qëndrimet e deputetëve të PD, të cilët kërkuan një proces përbashkues të demokratëve.
Berisha tha se i vetmi që kontrastonte me deputetët e PD, ishte i vetëshpalluri kryetar në detyrë Enkelejd Alibeaj.
Pas mbledhjes së Grupit Parlamentar të PD, Berisha tha se pati ide racionale dhe propozime konstruktive.
“Pas kaq orësh diskutime u pasurua shumë mendimi i PD për çështjet e diskutuara. Enkelejd Alibej u mërzit shumë pasi e njoftova se nuk ka më mbështetjen e Komisionit të Rithemelimit. Deputetët hodhën poshtë çdo pretendim për manipulimin e qëndrimeve të tyre”, tha Berisha.
Ish-Kryeministri tha se mbështet plotësisht verifikimet e anëtarësimeve për rreth 5 mijë seksione të partisë.
“Le të verifikohet gjithçka bazuar në statutin e PD”, tha Berisha. Ai akuzoi Kryeministrin Edi Rama, por jo vetëm, se po ushtrojnë presione mbi Gjykatën.
“Afati i ankimimit lidhur me vendimin e 25 marsit i përkiste Grupit të Rithemelimit dhe ka përfunduar dy javë pas dhënies së vendimit. Por Enkelejd Alibeaj po bën rolin e Edi Ramës, i cili po ushtron presion mbi Gjykatat dhe këtë e kam së paku nga dy burime”, tha Berisha.
