Komisioni i Ligjeve shqyrtoi 2 akte normative për ngritjen e bordit të transparencës për caktimin e çmimeve të karburantit, ku ka jo pak debate mes opozitës dhe maxhorancës. Enekelejd Alibeaj tha se Bordi nuk bën gjë tjetër vetëm se përcakton çmimet fikse, duke akuzuar se në këtë mënyrë është ktheyr ekonomia në kohën e komunizmit. Ai u shpreh se liria e veprimtarisë ekonomike mund të kufizohet me ligj vetëm për arsye të rëndësishme publike, duke i kërkuar llogari zv.ministrit të Infrastrukturës, Ilir Bejtjas, se cilat ishin këto arsye.
“Ky akt normativ nuk bën gjë tjetër, bordi përcakton çmimet në treg, si dikur në kohën e komunizmit ku përcaktoheshin çmimet fikse. Çmimet duhet t’i përcaktojë tregu. Kufizime të lirisë së veprimtarisë ekonomike mund të kufizohet me ligj për arsye të rëndësishme publike. Cilat janë arsyet e rëndësishme publike që detyruan qeverinë të bëjë këtë ndërhyrje të rëndë në Kushtetutë. Ka kthyer nga sistemi i demokracisë në diktaturë për ekonominë”, tha Alibeaj.
Zv.ministri u përgjigj duke u shprehur se u pa e udhës që të kishte një mekanizëm kontrolli, fillimisht sepse kishte dyshime se po abuzohej me çmimet, duke përmendur ndryshimin 3 herë të çmimit të naftës më 9 mars, nga 243 lekë litri, në 289 lekë litri dhe 290 lekë litri. Po ashtu, ai theksoi se tjetër arsye për ngritjen e Bordit ishte edhe cenimi i rezervës së sigurisë. Sipas tij, nuk ishin të sigurt nëse të gjithë bizneset e kanë përdorur apo jo rezervën e sigurisë për furnizimin e pikave të tyre të shitjes dhe se për 2 javë u mbyllën 120 deri në 130 pika karburanti brenda.
“Siguria e furnizimit dhe efekte që dha menjëherë rritja e çmimeve. Kishte edhe dyshime të justifikuara që kishte dhe abuzime me vendosjen e çmimeve, siç ishte 3 herë ndryshimi i çmimit të karburantit më 9 mars, ku çmimi i naftës nisi me 243 lekë litri, dhe shkoi në 289 lekë litri dhe 290. U pa e udhës të ketë një mekanizëm kontrolli ku u vendos mos të ketë më shumë se 6% marzh. Elementi i fundit, cenimi i rezervës së sigurisë. Nuk ishim të sigurt nëse të gjithë bizneset e kanë përdorur apo jo rezervën e sigurisë për furnizimin e pikave të tyre të shitjes. U mbyllën rreth 120 deri në 130 pika karburanti brenda 2 javësh, pika shitje me pakicë. Që mos lejonim krijimin e një situate tërësisht monopol, u krijua ky mekanizëm”, theksoi ai.
Në fund, me votat e mazhorancës u miratuan aktet normative.
