Kryeministri Edi Rama tha se do të miratojë amnistinë fiskale, edhe pse ndërkombëtarët janë kundër. Por Rama tha në Opinion se ka ikur koha kur ne ishim vasalë të ndërkombëtarëve.
“Ka ikur ajo kohë, Shqipërinë do e ndërtojnë shqiptarët, jo komuniteti ndërkombëtar”, tha Rama.
Ai tha se ka takuar një njeri që flinte në pemë, që punonte pa fund, dhe si puna e këtij ka me mijëra shqiptarë, që sot nuk sjellin dot kursimet e tyre në Shqipëri, sepse i dalin 100 probleme, jo ku i gjete, jo si i gjete, etj etj.
“Nga aministia përjashtohen dy kategori: të gjithë ata që kanë pasur poste të rëndësishme shtetërore dhe ata që janë të dënuar që lidhen me vepra të rënda penale”, tha Rama.
I pyetur nëse në Shqipëri qarkullon paraja e pistë, Rama tha se para të tilla ka kudo në Botë, por nuk mund të thuhet se kullat po ndërtohen me paratë e pista, pasi kalojnë në kontrolle rigoroze.
“Por të jeni të bindur se drejtësia do të ecë përpara, do të konsolidohet dhe shtrihet edhe te kullat, kush i ka ndërtuar si janë ndërtuar etj etj”, tha Rama.
Rama përjashtoi negociatat me ish-Kryeministrin Sali Berisha, për të cilin tha se vinte nga bota e tjetër, por shtoi se mes opozitës ka plot copa dhe çika, me të cilat do të flasim.
