Betim Kastrati është 38-vjeçari i cili u gjet rreth mesnatës i pa jetë në makinën e tij në aksin rrugor Fier – Lushnjë.
Sipas policisë, Kastrati u gjet i vdekur brenda automjetit tip “Volvo” në afërsi të rrethrrotullimit të Kolonjës. Po sipas të njëjtave burime, makina ishte e parkuar në mënyrë të rregullt në një xhep rruge.
Dyshimet paraprake të policisë janë se 38-vjeçari, i cili punonte si shoferi i Drejtorit të Portit të Durrësit Pirro Vëngu, është vetvrarë. Megjithatë hetimet për rastin vijojnë, pa përjashtuar edhe një vrasje të mundshme.
“Nga tërësia e veprimeve paraprake të kryera dhe provat e gjetura në vendngjarje dyshohet se shtetasi B.K., si pasojë e depresionit është vetëvrarë me armë zjarri pistoletë e cila u sekuestrua në cilësinë e provës materiale. Grupi hetimor nën drejtimin e Prokurorisë vijon punën për zbardhjen dhe sqarimin e plotë të rrethanave të ngjarjes”, thuhet në njoftimin paraprak të policisë për ngjarjen.
Kastrati ishte i martuar dhe baba i dy fëmijëve.
Një koleg i viktimës tha për “JOQ” se ka dyshime që 38-vjeçari i ka dhënë fund jetës. Po ashtu ai tregon se Betim Kastrati punonte me orë të gjata me Pirro Vëngun:
“U tmerrova nga lajmi kur e mora vesh nga kolegë të mitë, se pardje e përshëndeta ishte para oborrit të ministrisë së Infrastrukturës me të njëjtën makinë Volvo. Kishte sjellë drejtorin në një mbledhje në ministri, vetëm se kam dyshime se është vetëvrasje. Me zor priste i shkreti. Të mbyllte ditën e punës e të ikte në shtëpi tek fëmijët, ankohej gjithmonë se nuk gjente kohë ti dedikohej fëmijëve ti çonte në stërvitje pasi punonte me orë të gjata shofer me Pirron”.
