Diskriminim krahinor? Gjyqtarët e prokurorët nga Tropoja të shkarkuar në Veting (lista)

Nga Boldnews.al

Procesi i Vetingut për prokuroren Elisabeta Imeraj në Kolegjin e Posaçëm të Apelimit zbuloi një situatë të rëndë diskriminimi krahinor që ndiqet nga strukturat e rivlerësimit.

Prokurorja zbuloi komunikime të ish-kryetares së Komisionit të Pavarur të Kualifikimit (KPK), Genta Bungo Tafa me anëtarë të stafit të institucionit, duke përdorur shprehje diskriminuese ndaj gjyqtarëve dhe prokurorëve me origjinë nga Veriu i Shqipërisë.

Deputeti i Partisë Demokratike, Bujar Leskaj, në një seancë parlamentare të disa javëve më parë, e ka konsideruar “gjenocid” sjelljen e strukturave të Vetingut.

Leskaj, duke iu drejtuar deputetëve të maxhorancës, u shpreh se “Ju, vetëm me KPK-në tuaj të famshme gjatë 5 viteve, të cilës i zgjatët mandatin edhe për dy vjet, keni bërë një gjenocid të pastër ndaj gjyqtarëve dhe prokurorëve me origjinë nga Tropoja. I keni larguar të gjithë, dhe në sistem ka mbetur vetëm njëri, edhe ai sepse ka gruan nga Vlora”.

“Boldnews.al” kreu një verifikim mbi vendimet e Komisionit të Pavarur të Kualifikimit për subjektet e rivlerësimit me origjinë nga Tropoja.

Shifrat forcojnë dyshimin për “diskriminim krahinor”. Nga 17 gjyqtarë dhe prokurorë të identifikuar nga redaksia me origjinë nga Tropoja dhe të përfshirë në verifikime nga “Drejtësia e Re”, vetëm 2 prej tyre kanë kaluar pa probleme.

Më poshtë është lista e hartuar nga “Boldnews.al”.

Të shkarkuar nga Vetingu

1. Besim Trezhnjeva, gjyqtar në Apelin Durrës
2. Gani Dizdari, gjyqtar i Gjykatës Kushtetuese
3. Hysni Demiraj, gjyqtar i Apelit Tiranë
4. Arben Dollapaj, prokuror në Apelin Shkodër
5. Dritan Seci, Kryetar i Gjykatës Tropojë
6. Fatri Islamaj, gjyqtar i Apelit Tiranë
7. Artan Madani, Drejtues i prokurorisë Kavajë.
8. Skënder Haluci, Kryetar i gjykatës Vlorë
9. Besim Hajdarmataj, prokuror në prokurorinë Tiranë
10. Izet Dushaj, gjyqtar në Apelin Durrës
11. Ardit Mustafaj, gjyqtar i Gjykatës për Krime të Rënda (SPAK)
12. Idriz Mulkurti, gjyqtar i Gjykatës së Apelit për Krime të Rënda
13. Anton Martini, prokuror në prokurorinë Tiranë
14. Bujar Memia, i shkarkuar nga Këshilli i Lartë i Prokurorisë
15. Mimoza Margjeka, e arrestuar nga SPAK

Të konfirmuar

Deri më tani, vetëm dy subjekte me origjinë nga Tropoja janë konfirmuar me vendim të formës së prerë nga strukturat e Vetingut;

1. Artan Shtrungza, drejtues i Prokurorisë së Tropojës
2. Albert Kuliçi, prokuror në Vlorë, i cili është edhe subjekti i përmendur nga Bujar Leskaj në seancë plenare.