Një i ri u vra mbrëmjen e së dielës në aksin Tiranë-Durrës, rruga dytësore, në afërsi të kthesës së Rinasit.
Nga raportimet mësohet se viktima po udhëtonte me një automjet tip Fuoristrada, kur nga një tjetër makinë në lëvizje është qëlluar me armë zjarri.
Si pasojë e të shtënave ka humbur jetën 1 person, i moshës rreth 35-40 vjeç, i cili udhëtonte i vetëm në automjet.
Nga raportimet mësohet se viktima ka marrë plumba në kokë dhe trup.
Policia ka shkuar në vendin e ngjarjes dhe ka nisur hetimet, ndërsa fillimisht u dyshua për një aksident. Por nga kqyrja e vendit të ngjarjes, ku janë gjetur edhe gëzhoja armësh, policia ka konkluduar se kishte të bënte me vrasje.
Viktima mësohet se nuk ka pasur me vete mjete identifikimi, çka do të thotë se po punohet për identifikimin e tij.
Policia është njoftuar fillimisht nga qytetarë, për një makinë që kishte dalë nga rruga.
Dyshohet se autorët e ngjarjes e kanë ndjekur viktimën deri në vendin kur edhe kanë qëlluar me breshëri armësh në drejtim të automjetit tip Land Rover. Mësohet se policia ka nisur hetimet lidhur me ngjarjen, ndërsa shpresohet te kamerat e sigurisë, për të hedhur më shumë dritë mbi ngjarjen.
Tiranë/Informacion paraprak
Më datë 03.04.2022, në autostradën Tiranë-Durrës, përballë DHL-së, në rrethana ende të paqarta, është qëlluar me armë zjarri drejt një automjeti tip “Land Rover” dhe si pasojë ka ndërruar jetë drejtuesi i mjetit, ende i paidentifikuar.
Shërbimet e Policisë kanë shkuar menjëherë në vendngjarje dhe po vijojnë krehjen e zonës me qëllim kapjen e autorit/ëve.
Në bashkëpunim me DVP Durrës, Elbasan e Lezhë janë ngritur menjëherë pika kontrolli në rrugët interurbane.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
