Gjykata e Posaçme njohu me masën e sigurisë “arrest në burg” Nuredin Dumanin.
Seanca u krye në ambientet e Spitalit të Traumës, ku Dumani ndodhet pas plagosjes në ngjarjen e dy ditëve më parë, në Papërr.
Në GJKKO, Dumani është dërguar si i pandehur në gjykatë për vrasjen e Dorian Shkozës, Anxhelo Avdisë dhe Besmir e Viktor Haxhia, ngjarje të ndodhura pranverën e vitit 2020, në Durrës.
Dumani dyshohet për të paktën 7 ngjarje, ndërsa grupi i hetimit është në pritje të analizës së ADN-së, e cila do ballafaqohet me provat e gjetura në disa ngjarje kriminale.
Pas këqyrjes së telefonit të 37-vjeçarit nga Dibra, hetuesit kanë konstatuar se i dyshuari ka përdorur programin “EncroChat” i cili lejon shkëmbimin e mesazheve të koduara që lexohen vetëm nga dhënësi e marrësi dhe më pas, për disa sekonda, fshihen. Prokuroria e Elbasanit po shqyrton mundësinë e bashkëpunimit me autoritetet e huaja më qëllim zbërthimin e telefonit të 37-vjeçarit. Programi “EncroChat” përdoret nga persona me rrezikshmëri të lartë shoqërie apo grupe kriminale më qëllim shmangien e përgjimeve dhe gjurmimin nga organet e policisë. Për këtë arsye nga hetuesit po shikojnë mundësinë e dërgimit të telefonit të Dumanit në Belgjikë ose Itali në mënyrë që specialistët e huaj të rigjenerojnë mesazhet e shkëmbyera nga 37-vjeçari me qëllim zbardhjen e aktivitetit të tij kriminal.
Dyshohet se Dumani po përgatiste së fundmi një atentat ndaj Talo Çelës.
Raportohet se disa aksione të mëparshme për kapjen e tij kanë dështuar, pasi Nuredin Dumani kishte ndryshuar “look” në mënyrë që të mos njihej nga policia.
