Roman Abramovich, oligarku rus dhe pronar i Chelseat, thuhet se po punon “sinqerisht” për t’i dhënë fund konfliktit në Ukrainë, ka thënë Turqia.
Abramovich u pa në bisedimet e paqes të së martës në Stamboll, pavarësisht se nuk ishte një anëtar zyrtar i ekipit negociator të Rusisë.
Udhëheqësi i Turqisë, Recep Tayip Erdogan thotë se Vladimir Putin “i beson atij”.
“Abramovich mori pjesë në negociatat si pjesë e delegacionit rus. Në vend që të shikojmë se kush ishte në tryezë, ne duhet të shikojmë në emër të kujt ishin ata aty”, shtoi Erdogan.
Ministri i Jashtëm, Mevlut Cavusoglu, tha se Abramovich ka qenë në takimin mes Kievit dhe Moskës dhe ka punuar “sinqerisht” për t’i dhënë fund luftës.
“Sigurisht, bisedimet zyrtare janë të rëndësishme, negociatat janë të rëndësishme, por opinioni publik është i ndjeshëm, të gjithë duhet të ruajnë pozicionin e tyre dhe ka disa gjëra që duhet të mbahen të hapura midis liderëve dhe vendeve. Këtu, Abramovich luan një rol të dobishëm”, tha Cavusoglu.
