Pas kinezes Shuai e cila akuzoi ish zv/kryeministrin kinez për ngacmim seksual, një tjetër rast i tillë shokon botën e tenisit.
Jemi në SHBA kësaj radhe ku tenistja amerikane, Kylie McKenzie ka bërë një denoncim shokues ndaj ish trajnerit të saj madje dhe ndaj USTA, Shoqatës së Tenisit të Shteteve të Bashkuara.
Ajo dha një konferencë për shtyp, së bashku me avokatin e saj Robert Allard, për të njoftuar se do të ngrejë një padi për ngacmim seksual dhe sulm kundër Aníbal Aranda, ish-trajnerit të saj, dhe Shoqatës së Tenisit të Shteteve të Bashkuara (USTA).
“Unë u rrita në sistemin USTA dhe u besoja atyre. Shpresoja që ta merrnin më seriozisht, por gabova”, thotë tenistja 23-vjeçare duke akuzuar Unionin se nuk ka bërë asgjë.
“Aranda e përqafoi seksualisht dhe e preku Kylie praktikisht në të gjithë trupin e saj me argumentin se ishin teknika të reja stërvitore”, shpjegoi avokati i cili akuzon USTA-në se dinte të kaluarën e trajnerit Aranda përpara se ta caktonte atë si trajner për klienten e tij.
Dyshohet se sulmet seksuale të trajnerit kanë ndodhur në vitin 2018 teksa McKenzie po përpiqet të kthehet në cirkuit dhe të përpiqet të përmbushë ëndrrën për t’u bërë një teniste profesioniste ku aktualisht është jashtë 200 vendeve të renditjes për femra në WTA.
