Monika Kryemadhi, Kryetare e LSI, u shpreh nga foltorja e Kuvendit se drejtësia në Shqipëri funksionin me regji.
Referuar arrestimit të ish-deputetit Alqi Bllako, Kryemadhi tha se me 8 mars 2022, ai i ka shitur të gjitha bizneset e tij që ka pas në emër.
“Kur flasim për drejtësi, jo për drejtësi me regji. Duhet të flasim për një drejtësi të vërtetë. Duhet të flasim për drejtësinë që përmendi kolegu Këllici, për Ardit Gjokljan. Duhet të flasim dhe për viktimat e 21 janarit, kush i bëri, si i bëri dhe çfarë ndodhi dhe duhet zbardhur 21 janari një herë e përgjithmonë. Duhet të flasim për viktimat e Gërdecit, duhet të flasim për të gjitha viktimat që ka bërë mosgjykimi drejtësisë në shoqërinë shqiptare dhe që ka bërë pis klasën politike”, tha ajo.
Në vijim, kryetarja e LSI u shpreh se “bëmë një reformë në drejtësi, ku ne sot kemi dy rrugë, o përballjen përballë drejtësisë të qeverisë, të cilët kanë krijuar një megaferë të jashtëzakonshme që është përtej 430 milionë eurove të inceneratorëve ose do të kemi jetëgjatësinë e kësaj qeverie dhe rrëzimin e reformës në drejtësi të cilën e kemi miratuar me 140 vota”.
Lidhur me krizën energjitike, Kryemadhi shprehu dakordësi për akordimin e 200 milionë euro në ndihmë të KESH, por shtoi se janë më miliona euro që janë investuar për ristrukturimin dhe mirëmbajtjen e OSHEE për të ulur humbjet në rrjet, që të kemi prodhimin e energjisë elektrike e të tjera me radhë.
“Çfarë ka ndodhur me ato para që janë investuar? Jo pak para i është dhënë dhe Klodian Mërtirit nga OSHEE, çfarë është bërë me ato? Dhe dakord këto 200 milionë të tjera për çfarë do të shërbejnë? Do të shërbejnë për blerje të energjisë elektrike, do të shërbejë për instalim sahatësh në shtëpitë e qytetarëve, do të shërbejnë për humbjet në rrjet? Apo e degraduan sistemin e energjisë elektrike, për të fituar një dorë parash në një anë dhe për të hapur një hapësirë tjetër në anën tjetër.
Ne kemi më shumë zonja në qeveri se çdo qeveri tjetër shqiptare. Po do doja që zonjat tona të mos ishin mish për top siç përfundoi Alqi Bllako sot”, tha Kryemadhi.
