Gjykata e Krimeve të Rënda la në “arrest me burg”, mesditën e së dielës, dy ish-drejtuesit e policisë në Vlorë dhe Tepelenë, të akuzuar për shpërdorim të detyrës dhe favorizimit të kultivimit të kanabisit.
Haki Hasanbegaj, me detyrë shef i rendit në Komisariatin e Vlorës dhe Gani Abazi, me detyrë shef i specialistëve në Komisariatin e Tepelenës, iu drejtuan gjykatës në mënyrë individuale për të cilësuar, jo të ligjshëm arrestimin e tyre. Ata nuk i pranuan akuzat.
Nga ana tjetër prokuroria në kërkesat e saj për vlerësimin e masës së sigurisë për ta u shpreh se ka prova dhe përgjime që i fajësojnë ata me akuzën e shpërdorimit të detyrës dhe favorizimit të kultivimit të kanabisit. I njëjti vendim u dha edhe për Musa Bedinajn, i cili mendohej se ishte organizatori i kultivimit të kanabisit në parcela.
Sipas organit të akuzës të dy drejtuesit e policisë kishin dijeni se në vende të caktuara mbillej kanabis dhe nuk e goditën atë, duke e favorizuar dhe njëkohësisht edhe duke shpërdoruar detyrën.
Gjykata e Krimeve të Rënda, pasi i dëgjoi palët, vendosi t’i lërë ata me masën e arrestit me burg.
