Forcat speciale RENEA arritën të arrestojnë mbrëmjen e sotme në lagjen Apollonia në qytetin e Fierit, Nuredin Dumanin, i njohur ndryshe si “njeriu hije”.
Dumani u arrestua disa orë pas një ngjarjeje të ndodhur në Elbasan, ku ka pasur shkëmbime zjarri mes dy automjeteve, dhe mendohet se ai është i përfshirë, ndërsa në automjetin tjetër ndodhej Talo Çela.
Për arrestimin e Dumanit RENEA ka përdorur edhe dronët, ndërsa informacionet janv siguruar në rrugë operative mbi vendndodhjen e tij.
Në momentin e arrestimit Dumani ka qenë i armatosur, por nuk ka bërë rezistencë, ndërsa dyshohet se ai ka qenë edhe i plagosur. Nga të dhënat e para mësohet se ai ka pasur një plagë me armë zjarri, ndoshta nga përplasja e ndodhur në orët e pasdites në Elbasan.
Nga të dhënat mësohet se Dumani strehohej në një apartament në një pallat 9 katësh, rreth 1 km larg nga urgjenca spitalore e Fierit.
Nuk dihet nëse ai më parë ka marrë mjekimin në Urgjencë apo jo, por policia e ka arrestuar në një nga apartamentet e pallatit, që më parë u rrethua nga RENEA dhe FNSH.
Përplasja në Elbasan
Pranë fshatit Papër, në Elbasan, është qëlluar me armë ndaj një automjeti tip BMW në lëvizje. Nuk dihet objektivi i atentatit, pasi sipas policisë, personat që ndodheshin në makinë e kanë braktisur mjetin tek vendi i njohur si ura e Zezë.
Burimet tregojnë se në këtë makinë u gjet dhe armë kallashnikov dhe një bidon benzinë. Nisur nga këto fakte, ka dyshime se personat që udhëtonin me të, mund të kishin planifikuar një atentat, por janë pikasur.
Pamjet tregojnë se xhamat e makinës dhe rrotat janë shpuar nga plumbat. Mësohet se targa rezultojnë të vjedhura në prill të 2021, në Durrës.
Kush janë Talo Çela dhe Nuredin Dumani
Talo Çela bashkë me Nuredin Dumanin, Altin Ndocin, Klevis Allën, Besian Xhixhën dhe Enver Didën akuzohen për vrasjen e dy vëllezërve Besmir dhe Viktor Haxhiajt, si dhe vrasjen e Dorian Shkozës dhe Anxhelo Avdias, të ndodhura në Durrës në vitin 2019 brenda një harku kohor prej dy javësh.
Një tjetër akuzë që rëndon ndaj Talo Çelës, i cili bashkë me Dumanin konsiderohen krijuesit e grupit të strukturuar kriminal, është ajo e vrasjes së mbetur në tentativë ndaj Irfan Hazizit. Talo Çela është personi më i kërkuar aktualisht nga policia dhe së bashku me Nuredin Dumanin prej 2 vitesh janë në arrati.
Nuredin Dumani ishte shpallur në kërkim për vrasjen e vëllait të Talo Çelës, Bujar Çela, ngjarje e ndodhur në vitin 2020 në Elbasan. Prokuroria thotë se Dumani ka qenë pjesë e grupit që bëri ekzekutimin e vëllait të Talo Çelës.
