Kryetari i grupit parlamentar socialist, Taulant Balla paralajmëroi miratimin e kërkesës së SPAK për heqjen e imunitetit të deputetit Alqi Bllako.
Më herët gjatë ditës, Prokuroria e Posaçme kërkoi arrestimin e deputetit Alqi Bllako, për të cilin konstaton se ka kryer shkelje ligjore në procedurën për inceneratorin e Fierit. “Për shtetasin Alqi Bllako, nisur nga fakti që është i zgjedhur deputet në Kuvendin e Republikës së Shqipërisë, Prokuroria e Posaçme bazuar në parashikimet e nenit 73/2 të Kushtetutës së Republikës së Shqipërisë dhe nenit 288/1/2 të Kodit të Procedurës Penale, do të paraqesë kërkesë Kuvendit për dhënie të autorizimit për caktimin e masës sigurimit personal ‘arrest në burg’”, thuhet në njoftim të SPAK.
Në një prononcim për gazetarët, Taualnt Balla la të kuptohet se kërkesa e prokurorisë do marrë dritë jeshile nga grupi parlamentar socialist. I pyetur për çështjen, Balla foli për “sukses te reformës në drejtësi” dhe u shpreh se PS s’është mburojë për askënd.
“Unë s’jam i gëzuar për askënd që kërkohet masë sigurie arrest me burg në aspektin njerëzor, të të qënit pjesë e kuvendit si koleg. Por, ka një aspekt tjetër që biem te gjithë dakord që forca udhëheqëse e PS në të çuarit përpara të reformës në drejtësi, ka pasur objektin arritjen e një momenti që drejtësia të funksionojë dhe të vendoset para drejtësisë çdo person i çdo krahu politik. Do punojmë në këtë drejtim për të thelluar efektet e reformave. PS ka vendosur një vijë të kuqe me këdo. Sapo ndaj një përfaqësuesi të PS drejtësia vendos një masë sigurie apo sjell në Kuvend një kërkesë për hetime apo çështje të tjera, natyrshëm që vija e kuqe është që PS s’është mburojë për askënd. Kjo do jetë një vijë e kuqe për këdo dhe do mbajmë këtë qëndrim në mënyrë konseguente. Për ne është e rëndësishme që drejtësia të bëjë punën e saj pa u penguar nga heqja e imunitetit”, tha Balla.
Ai saktësoi se mbledhja e Këshillit për Rregulloren, Mandatet dhe Imunitetin nis nesër në 18:00. Në mbledhje do shqyrtohet kërkesa e SPAK për Bllakon.
/BN/
