Një prej punonjëseve të helmuara në kompaninë “Forschner Albania”, në Durrës, dyshon se gjithçka ka ndodhur si pasojë e barit të përdorur për dezinfektim të ambienteve të brendshme të kompanisë.
Ajo shprehet se një pjesë e madhe e punonjëseve kishin shkuar në shtëpi për t’u qetësuar.
“Shkuam në mëngjes në punë dhe na ndanë punët. Pas 10 minutash nisën shenjat e para të helmimit. Kishim marrje mendësh dhe bllokim frymëmarrje. Nxorrën jashtë punonjësit derisa erdhi mjeku. Nuk na lajmëruan se kishin bërë dezinfektim ditën e djeshme. Një pjesë e madhe e punonjësve kanë shkuar në shtëpi. Mendoj se helmimi ka ardhur si pasojë e barit që përdorin për disifektim të ambienteve të brendshme”, tha ndër të tjera një prej grave të helmuara në Durrës, raporton Faxnews.
Ndërkohë, Policia në një njoftim thekson se “mesditën e sotme janë paraqitur në spitalin e Durrësit, shtetaset O. A., 41 vjeçe, A. R., 26 vjeçe, M. Xh., 30 vjeçe, A. Gj., 35 vjeçe dhe J. K., 38 vjeçe, të cilat dyshohet se janë helmuar në ambientet e punës, në një firmë në autostradën Durrës-Tiranë. Aktualisht ndodhen nën kujdesin e mjekëve, jashtë rrezikut për jetën”.
Grupi hetimor ndodhet në vendngjarje dhe po punon për sqarimin e rrethanave të ngjarjes.
