Demetrio Albertini i ka thurur elozhe Milan-it kryesues. E ka bërë këtë në një intervistë të dhënë për Gazzetta dello Sport:
“Milan-i ka një vetëdije, një pjekuri, që më parë nuk e shihja. Shikoni mënyrën si kanë reaguar në situata delikate si gabimet e arbitrave kundër Spezia-s dhe Udinese-s”, ka thënë Albertini.
“Një skuadër që nuk është e përgatitur mund të dorëzohet para pakënaqësive të tifozëve, ndërsa Pioli dhe skuadra e tij nuk e kanë bërë: kanë ngritur kokën dhe kanë vazhduar përpara.
Kanë bërë një punë shumë të mirë. Duam të bëjmë më shumë pikë se vitin e kaluar dhe më pas do të shohim se ku do të jemi”, ka shtuar ish-mesfushori i Milan-it.
“Tonali është simboli i Milan-it që ka arritur deri këtu: konstant, solid, i organizuar. Bashkë me të edhe shokët e mbrojtjes dhe Maignan, një portier shumë i mirë.
“Megjithatë, kur bëhen llogaritë, janë sulmuesit që vendosin dhe Pioli është në rregull me ata të tre. Giroud është një kirurg, Leao ka fantazi dhe Ibra është një kampion i jashtëzakonshëm që është kthyer në momentin e duhur.
“Imagjinoni Zlatan që shënon golin vendimtar për fitoren e titullit: në moshën 40 vjeç, do të mjaftonte për ta bërë edhe këtë sezon të jashtëzakonshëm”.
