Pas dorëheqjes nga kryetari i Partisë Demokratike, Lulzim Basha nuk e ka më zyrën në selinë blu. Ish-lideri demokrat ka marrë një “shtëpi të re”, e cila ndodhet në katin e 10-të të qendrës “Torre Drin”, shumë pranë godinës ku ndodhet selia e Partisë Demokratike.
Zyrën e tij në selinë blu, që Basha e mbajti për 9 vite e ka boshatisur ditën e djeshme. Nga zyra e re, Basha ka nisur edhe axhendën e takimeve, ndërkohë që aty punon edhe stafi personal, më i ngushtë i Luzim Bashës.
Basha dha dorëheqjen si kryetar i PD-së pas presioneve të shumta nga Grupi Parlamentar dhe Kolegji i Kryetarëve, pas disa humbjeve radhazi në zgjedhje.
Në deklaratën e tij, ai tha se po bënte një hap pas për të bashkuar demokratët, por shtoi se do të vijojë qëndrimin në PD.
Nuk dihet nëse Basha do të kandidojë sërish për t’u rizgjedhur kryetar partie, pasi drejtimin e PD-së e ka marrë Komisioni i Rithemelimit.
