Deputeti demokrat Flamur Noka, njëkohësisht anëtar i Komisionit të Rithemelimit të PD, apeloi për bashkim të demokratëve këtë të Shtunë, në një prononcim për gazetarët nga selia blu.
“Dua të jap dy mesazhe. I pari është ç’bunkerizimi i PD. I dyti rrugën me çdo demokrat nga më i thjeshti në bazë deri deputetët në qendër, e kemi së bashku. Pas ç’bunkerizimit kjo seli do ti rikthehet normalitetit, do jete e hapur për çdo demokrat. Kjo periudhë që ka kaluar do hidhet pas dhe dëshiroja as mos ta kujtonim këtë situatë që ka kaluar PD dhe demokratët. Do shohim përpara se s’mund të rrimë peng i bunkerit as mentalitetit të përçarjes. Do bashkohemi. Beteja do jetë me regjimin që po i pi gjakun shqiptarëve, që në asnjë vend të Europës s’ekziston më i egër se sa në Shqipëri”, tha Noka.
I pyetur nëse Basha do përjashtohet nga PD, Noka e mohoi: “Në PD ka vend për cac qytetar të lirë të këtij vendi që s’pajtohet me regjimin dhe është kundër këtij regjimi. S’do jetë partia as e bravave as e dyerve të mbyllura, do jetë parti e hapur se si e tillë është themeluar në 1990 dhe është r themeluar në 2021. Do jetë e hapur për Bashën që do jetë një nga kolegët tanë dhe për çdokënd”.
A do të takohet sërish me Enkelejd Alibeajn?
“Takim patjetër, kafe shumë miqësore se jemi kolegë, jemi në të njëjtën forcë politike, kemi të njëjtën aspiratë, të njëjtën rrugë dhe kemi të njëjtin regjim përballë. Jemi të hapur në këtë aspekt. S’na ndan asgjë, vetëm në funksion të bashkimit. Të gjitha hijet e së shkuarës hidhen pas. Javën tjetër kemi mbledhje të grupit për të organizuar axhendën në betejën me regjimin dhe pastaj avash-avash të gjitha do shkojnë në vendin e vetë”, tha Noka.
“Alibeaj është kryetari i grupit parlamentar, do e takojmë sërish, kemi rënë dje dakord për të vijuar bisedimet për mbledhjet e grupit. Dhe grupi parlamentar do mblidhet. E respektojmë Alibeajn në cilësinë e kryetarit të grupit se është miku jonë, është kolegu jonë”, u shpreh më tej.
I pyetur nëse demokratët që morën pjesë në protestën e 8 Janarit do jenë dakord të qëndrojnë në një seli me ata që i dhunuan, Noka tha se inatet duhen hedhur pas krahëve.
“Demokratët janë tolerantë në natyrën e tyre po dhe mendjehapur. Ata e dinë shumë mirë, po s’hodhën pas hijet e së shkuarës, s’mund të ecim përpara. Nëse rrimë peng i inateve, është problem për të ecur përpara”, deklaroi deputeti.
Lidhur me vendimin e Gjykatës së Tiranës që njohu Kuvendin e 11 Dhjetori dhe pretendimet për apelim nga Alibeaj, Noka tha: Dhe Bardhi, dhe Alibeaj janë juristë që e njohin ligjin. Një gjë është universale, vendimet e gjykatave nuk komentohen, ato zbatohen.
Lidhur me deklaratat e Bardhit se gjyqtari që njohu Kuvendin e 11 Dhjetorit është takuar me përfaqësues të Komisionit të Rithemelimit, Nokën tha: “Në rast se zoti Zhukri është takuar me një kriminel të rrezikshme është tjetër gjë, drejtësia duhet të hetojë, nëse është takuar me një qytetar të lirë unë nuk e shoh ku qëndron problemi, shantazhi që i bëhet gjyqtarit 12 orë para se të merrte vendin, ajo është vepër penale në bazë të ligjit. Sot jemi për të përcjellë mesazhin e bashkimit. Zhukri është takuar edhe me njerëzit e afërt të Bashës, por për ne nuk ka asnjë rëndësi ajo”.
I pyetur nëse të përjashtuar nga PD nga ish-kryetari Basha do ti bashkohen PD-së, Noka deklaroi: “Berisha dhe Partia Dmoekratike ka patur në axhendën e saj primare hapjen e PD. Do ftoj gjithë ata që kanë qenë kontributorë dhe janë larguar, kapacitetet intelektuale, të rinj e të reja. Kjo pari do japë një leksion të hapjes”.
Noka tha po ashtu se punonjësit e PD që janë hequr nga puna nga Basha do të rikthehen dhe do hiqen fortifikimet në seli, që u vendosën para protestës së 8 Janarit.
