Një prej dy bizneseve në Shkodër, ku në orët e para të mëngjesin është vendosur lëndë plasëse, është në pronësitë Xhemal Bushatit. Ky i fundit garoi në zgjedhjet e pjesshme lokale të 6 Marsit për Shkodrën, nën siglën e PD-së.
Nga shpërthimet nuk ka të lënduar, por janë shkaktuar dëme materiale.
Shpërthimet janë regjistruar në dy zona të ndryshme të Shkodrës me një distancë nga njëra tjetra rreth 1 km.
Shpërthimi i parë është dëgjuar rreth orës 02:20 në supermarketin SPAR, në pronësi të personit me inicialet F.M. në lagjen “Kongresi i Permetit”.
Pas gati 10 minutash, është dëgjuar edhe shpërthimi tjetër në biznesin (dyqan veshjesh) “LC Waikiki” në pronësi të Xhemal Bushatit, në zonën e pedonales.
Vetë Bushati jeton në katin e tretë të objektit, ku ndodhi shpërthimi në lagjen “Vasil Shanto”, ndërsa biznesin e tij e kishte në katin e parë.
Është ende e paqartë nëse dy shpërthimet kanë lidhje me njëri-tjetrin. Kamerat e sigurisë nëpër bizneset në zonë janë të shumta, që mund të ndihmojnë në zbardhjen e shpejtë të ngjarjeve, ndërsa policia ka nisur hetimet.
