Një incident ka ndodhur në selinë e PD, teksa kryetari i komanduar nga Gazment Bardhi, Enkelejd Alibeaj, po jepte versionin e tij lidhur me takimin që kishte pasur me anëtarë të Komisionit të Rithemelimit, mes të cilëve edhe ish-Kryeministrin Sali Berisha.
Në momentin që Alibeaj me një gjuhë përçmuese dhe cinike, tha se selia e PD ishte vizituar nga të paftuar, duke iu referuar Berishës, një grua është futur në sallën e konferencave duke bërtitur teksa në dorë kishte teserën e PD-së.
“Në emër të Birit, të Atit dhe Shpirtit të Shenjtë nuk mund të më pengoni të bërtas këtu”, tha ajo teksa bërtiste “mos më prek!”, “mos më prek!”.
“Kam vënë këmbën aty që fëmijë dhe kjo është shtëpia e lirisë. Nuk ka tradhtarë, ka vetëm shqiptarë dhe emigrantë që punojnë për Shqipërinë. Mos më tregoni se çfarë dua të bëj se po luftojmë për jetë a vdekje”, tha ajo.
Gruaja është shoqëruar jashtë sallës së konferencës nga një person, ndërsa ajo vijonte të tregonte teserën e PD.
