Ish-kryeministri Sali Berisha bëri thirrje për bashkim të demokratëve në një deklaratë nga selia e PD-së këtë të Premte.
Më herët gjatë ditës, Berisha dhe anëtarë të tjerë të Komisionit të Rithemelimit patën një bisedë me Enkeljed Alibeajn dhe Gazmend Bardhin, në zyrën e këtij të fundit.
Boldnews sjell një fotografi nga takimi, për të cilin Berisha foli edhe gjatë konferencës për mediat.
“S’ishte vetë shtrëngim duarsh, por dhe diskutime për problemet. Në këtë diskutim unë kërkova angazhimin e tyre në procesin e bashkimit të PD-së, kontributin e tyre dhe çdo demokrati. Mund të them se i gjeta të preokupuar për këtë proces por diferenca në mendime ekziston. Është në detyrimin e të gjithë drejtuesve aktual të dialogojnë, të debatojnë, të diskutojnë në grupin parlamentar të PD-së. Komisioni i Rithemelimit ka besim të plotë te grupi parlamentar i kësaj partie dhe mesazhi më i mirë që mund të përcjellë është normalizimi i jetës së këtij grupi në interesin më të mirë të PD-së dhe të kombit”, tha Berisha.
Berisha tha se s’mund të ketë të larguar nga PD, ndërsa kërkoi që demokratët “ti japin dorën njeri-tjetrit”.
