“Je gati për një aperitiv? Shihemi tek frigoriferi”. Dhe frigoriferi ishte një depozitë frutash ndërsa aperitivi në fakt tregonte një vend të furnizimit me kokainë.
Policia italiane ka arrestuar mëngjesin e kësaj të shtune 3 shqiptarë nën akuzën e trafikut të drogës në territoret e Manta dhe Verzuolo, në Savona shkruajnë mediat lokale. Pas hetimit të nisur që në qershor të 2016, karabinierët e Saluzzos kanë zbuluar 3 ‘sipërmarrësit’ e vërtetë të drogës.
Sipas mediave italiane, janë arrestuar Ergys Gerbeti, Ermal Hasani dhe Bekim Kapidanja, rezident në Verzuolo dhe Manta dhe përgjegjës për posedimin dhe trafikimin e lëndëve narkotike.
Shqiptarët kishin krijuar një monopol kokaine në zonat periferike të Saluzzos, duke përdorur mesazhe të koduara. “A je gati për një pije? Takohemi tek frigoriferi”. Frigoriferi në këtë rast nënkuptonte vendin e furnizimit me kokainë.
Ata ia dilnin të shisnin të paktën 15-16 doza kokaine në ditë, me vlerë 90-100 euro secili.
Lideri i grupit ishte Ergys Gerbeti, i cili shpërblente dy bashkëpunëtorët e tjerë për aktivitetin e paligjshëm.
Për të shmangur kontaktin e drejtpërdrejtë me klientët, shpërndarësi i drogës e linte atë në një vend të caktuar më parë përmes sms-ve, (zakonisht poshtë disa gurëve në anë të rrugës) për t’u kthyer për të marrë lekët në të njëjtin vend.
3 shqiptarët e arrestuar janë vënë në pranga në banesat e tyre, ku karabinierët kanë sekuestruar celularë dhe materiale të tjera të nevojshme për hetimet. Pas arrestimit, ato janë dërguar në burgun e Cuneo në pritje të autoritetit gjyqësor.
