Një linjë e trafikut të drogës që dyshohej se bëhej prej disa kohës me autobusin Tiranë-Elbasan është shkatërruar mbrëmjen e djeshme.
Pas arrestimit Policia e Elbasanit ka bërë publike detaje në lidhje me këtë operacion që është koduar me emrin “Udhëtari”.
Si rezultat i këtij operacioni, është bërë arrestimi në flagrancë i Ermir Skurajt, 25 vjeç banues në fshatin Pishkash të Librazhdit.
Arrestimi i tij u bë pasi, në vendin e quajtur “Ura e Kushës” në Bradashesh, gjatë kontrollit të ushtruar në autobusin e linjës Elbasan-Tiranë , në bagazhin e autobusit u gjet dhe u sekuestrua në cilësinë e provës materiale: 2 kg lëndë narkotike e dyshuar me atë të llojit kanabis sativa.
Pas hetimeve të para të bëra nga policia rezultoi se lënda narkotike dyshohet se i përkiste shtetasit të lartpërmendur.
