Nga Boldnews.al
“Me 130 euro në muaj nuk quhesh i varfër”-tha ministrja e Financave, “kurseni më shumë”-shtoi ajo në një takim që e shihnin disa sy live dhe shumë të tjerë nëpërmjet televizionit. “Do ulim 50 % shpenzimet për karburantin”-tha kryeministri Rama dhe më pas hipi në një fuoristradë që të fik nga karburanti, i shoqëruar me një varg të madh makinash të tjera të mbushura me rojet e tij. Për të mirën e vendit po e bën, për popullin, që edhe pak do që të dalë nga varfëria dhe të përfshihet në kategorinë e të pasurve, vetëm pasi të ketë siguruar 130 euro në muaj.
Kriza na ka kapur kudo pas nisjes së luftës Rusi-Ukrainë, por qeveria nuk u gjet e papërgatitur. Menjëherë ndezi kamerat, u fut ngeshëm në rrjetet sociale të kryeministrit dhe nisi të informojë popullin se “lufta e tretë botërore është në prag”, “bombat atomike na kërcënojnë”, “nuk do ketë më naftë”, “rrezikojmë që të shkëputet energjia, duke lënë qindra mijëra qytetarë pa punë”. Ka edhe më rëndë, shumë më rëndë, nëse nuk ke drita nuk sheh televizor, e po ashtu mbesin pa karikuar edhe telefonët, atëherë ku do shfaqet Rama?
Ky është vërtetë hall dhe nuk duhet marrë me shaka, as nga ata që protestojnë për çmimet e larta. Karburanti u rrit frikshëm, çmimet e ushqimeve gjithashtu kapërcyen çdo limit, por mbi të gjitha buka. Megjithatë jemi me fat që në këtë “gjullurdi botërore” vendi drejtohet nga ministra dhe ministre të përgjegjshme, që e njohin me imtësi sektorin që i kanë besuar.
“Mbillni grurë tani” -tha ministrja e bujqësisë, dy muaj para se ai pak grurë të korret, duke mos e ditur se gruri mbillet në muajt shtator-tetor, por në këtë pikë nuk ka si ti vihet faj, sepse është e zënë në përgatitjet që po bëhet në ngritjen e Akademisë së Çobenjve.
Sot Rama bashkë me ministren që i ka të thjeshta llogaritë me 130 euro për tu konsideruar jo i varfër, shkoi nëpër furra buke dhe markete, duke “inspektuar” çmimet. Para pak ditësh ishte me grosistët e bukës, ku i përmalluar i vlerësoi ata, ndërsa sot u kujtoi se të mos e shkelin me peshën e bukës.
E ku kemi parë ne qeveri që ti dhimbsen njerëzit, madje edhe kafshët. Por ne po e plakim, po e mërzisim, duke dalë në protestë, sepse nuk kemi çfarë tu çojmë fëmijëve në shtëpi. Ishim mësuar keq, duke ngrënë tre herë në ditë, pa e kuptuar se kishte më keq se ne. Edhe homologu i Ramës, lideri i Koresë së Veriut, Kim Jong Un nuk është në ditët e tij më të mira. Edhe ai po takon përditë zyrtarë, duke u shfaqur i rënë në peshë. Autoritetet kanë insistuar se udhëheqësi po ha më pak “për të mirën e vendit” që përballet me mungesa të theksuara pasi nuk kanë mundësi të blejnë për shkak të rritjes së çmimeve.
“Zyrtarët lokalë të partisë kanë thënë se humbja në peshë e liderit nuk vjen nga probleme shëndetësore, por sepse ai po vuan në vetmi për fatin e vendit dhe popullit”. Rama është parë sot i veshur me një xhybe dhe me mjekrën e zbardhur nga hallet. “Kujdes me abuzimin e çmimeve”-tha ai i vendosur, kur u futur në një supermarket, i shoqëruar nga shokët dhe shoqet që e ndiqnin me kamera, aparatë fotografik dhe me telefona ndezur. Të afërt me liderin thonë se stafi e ka inkurajuar atë të vijë në formë “e të çlodhet” për “të mirën e popullit”.
Burime të sigurta nga persona pranë Ramës shprehen se ai prej kohësh nuk shihet nëpër lokale të shtrenjta, madje edhe ministrave u ka kërkuar që të mos bëjnë jetë luksi, duke darkuar dhe drekuar vend e pa vend. Kur vetë Ai po konsumon më pak, përfshi edhe karburantin të gjithë të tjerët duhet ta ndjekin, po e bën për të mirën e popullit.
