Partinë Demokratike, pas dorëheqjes së Lulzim Bashës, e ka marrë Enkeled Alibeaj, i emëruar në postin e nënkryetarit dhe Kryetarit të Grupit Parlamentar.
Njoftimi u bë nga Gazment Bardhi, i cili mban postin e Sekretarit të Përgjithshëm në partinë që drejtohej nga Basha. Ai sqaron se ka zhvilluar një takim me nënkryetarët Jorida Tabaku, Enkelejd Alibeaj dhe kryetaren e emëruar të Këshillit Kombëtar, Arta Sakja, për të përcaktuar drejtimin e PD. Bardhi shprehet se pas tërheqjes së Tabakut, emri që i propozohet Këshillit Kombëtar bazuar në statut është ai i Enkelejd Alibeajt.
“Pasi jam njohur me deklaratën e Kryetarit të Partisë Lulzim Basha se ka vendosur të hedhë një hap pas duke u dorëhequr nga detyra e kryetarit të PD për të ndihmuar në ringritjen e PD, kam thirrur në një takim urgjent pune për të diskutuar për situatën Nënkryetarët e Partisë znj. Jorida Tabaku dhe z. Enkelejd Alibeaj, si dhe Kryetaren e Këshillit Kombëtar të PD znj. Arta Sakja”.
“Në mbështetje të Statutit të Partisë dhe për të mos krijuar asnjë vakuum në drejtimin e Partisë në këtë moment të vështirë dhe specifik, kam konsultuar të dy Nënkryetarët me qëllim paraqitjen për zgjedhjen menjëherë nga Këshilli Kombëtar të komandimit të njërit prej tyre për drejtimin e Partisë.
Në takim kam marrë konfirmimin e Nënkryetares znj. Tabaku se heq dorë nga e drejta statutore për t’u propozuar në Këshillin Kombëtar për drejtimin e Partisë. Për pasojë, në përputhje me nenit 46 të Statutit, drejtimi i partisë në këtë periudhë tranzitore, deri në vendimmarrjen e institucioneve të partisë, do të behet nga Nënkryetari i Partisë dhe Kryetari i Grupit Parlamentar z. Enkelejd Alibeaj”, tha Bardhi.
