Ndërsa ju drejtua protestuesve të mbledhur para Kryeministrisë, aktivisti Mirgen Qiraxhi u tha se falë qëndresës së tyre qeveria ka filluar të lëvizë.
Edhe pse sipas tij paketa mbështetëse nuk mjafton, të paktën protesta ndali shpenzimet marramendëse të qeveritarëve.
“Falë jush kemi parë si çmimi i naftës të bjerë me 60 lekë. Falë jush dhe qëndrëses tuaj ju keni fituar një palo paketë për rezistencë. Falë jush institucionet kanë filluar disi të lëvizin. Falë jush shpenzimet e kësaj qeverie kanë filluar reduktohen, ministrat e kësaj qeverie që ndiznin makinën dy orë para që kur të zbrisnin nga shtëpia ta gjenin të ngrohtë. Ju ja pretë. Falë jush kanë pretenduar se do ndalin spekulimin. Falë jush ai e kuptoi se këto nuk mjaftojnë. Qytetarët kanë nevojë për dinjitet, të jetojnë të begatë brenda kufijve të tyre”.
Qiraxhi nuk la pa komentuar edhe deklaratat e kryeministrit Rama, i cili i ka konsideruar protestat një turp kombëtar.
“Askush nuk është turpëruar nga ju, askush nga bota perëndimore nuk është turpëruar nga ju, askush që ka dëshirë për demokraci nuk është turpëruar nga ju, ju keni turpëruar një kryemninisër që ju mban të fundit në ekonomi, në arsim, në kujdes shëndetësor. Kjo është protesta e njerëzve të lirë, e pensionistëve, e prindërve dhe fëmijëve, protesta unike në 8 vite që nuk ka shkulur një lule, nuk ka bërë pis një trotuar, nuk ka prekur një polic, ky është tmerri i tij. Protesta jonë paqësore është dhunë ndaj tij, e keni mbyllur brenda dyerve të hekurit në mënyrë të pakuptimtë. Askush nuk duhet të ketë frikë, këta janë qytetarët e Shqipërisë, kjo është Shqipëria”.
