Kryetari i Kuvendit Ilir Meta i ka kërkuar kryeprokurorit Adriatik Llalla që të shprehë një qëndrim institucional në lidhje me procesin e përzgjedhjes së kandidaturave për Këshillin e Emërimeve në Drejtësi dhe respektimin e kritereve në përputhje me Kushtetutën dhe ligjin.
Kryeparlamentari i ka dërguar një shkresë në rrugë zyrtare Kryeprokurorit Adriatik Llalla, për të mësuar me detaje mënyrën e përzgjedhjes së tre prokurorëve kandidatë, për tre vende në KED, institucionin e krijuar nga reforma në drejtësi.
Shorti për përzgjedhjen e anëtarëve u mbajt në kryesinë e Kuvendit, një proces i hapur edhe për mediat.
Kërkesa vjen një ditë pasi ambasadori i SHBA-ve, Donald Lu akuzoi Prokurorin e Përgjithshëm, Adriatik Llalla për cenimin e frymës Kushtetutës lidhur me kandidaturat e paraqitura nga kryeprokurori për shortin e Këshillit të Emërimeve në Drejtësi, duke propozuar vetëm tre emra për tre vende që duhet të hidheshin me short.
Pas përgjigjes së Prokurorisë së Përgjithshme, Kryetari i Kuvendit, Meta do të mbajë një qëndrim publik.
