Prej dy javësh një virus i rrezikshëm ka prekur shpendët dhe po qarkullon nëpër pularitë në zonën e Durrësit. Deri më tani raportohet të kenë ngodhur të paktën 400 mijë pula, duke shuar tre pulari të mëdha në qytetin bregdetar e duke rritur panikun tek qytetarët.
Mirëpo Ministria e Bujqësisë e ka mohuar aludimin se bëhet fjalë për grip shpendësh, pasi sipas tyre, ekspertët kanë shkuar për të bërë testimet e nevojshme dhe nuk kanë gjetur asnjë shenjë. Nga shpendët e ngordhura, Ministria e Bujqësisë bën me dije se nuk ka sëmundje që rrezikojnë konsumatorin apo produktet me origjinë nga shpendët. Por sërish nuk sqaron se çfarë e ka shkaktuar ngordhjen masive të shpendëve.
Ndërkohë që edhe pak ditë më parë Drejtori i Parkut Kombëtar të Karavastasë, Ardian Koçi tha se një virus shkaktoi ngordhjen e 60% të pelikanëve kaçurrel në liqenin e Prespës, duke paralajmëruar se rrezikon të përhapet në të gjithë Shqipërinë. Megjithatë mbetet e paqartë nëse bëhet fjalë për të njëjtin virus pasi Ministria është mjaftuar vetëm me mohimin e lajmit për përhapjen e gripit të shpendëve, pa dhënë asnjë detaj se ç’po ndodh e nëse ka pasur shpendë që kanë përfunduar në treg për t’u konsumuar nga qytetarët.
Në një kohë kur që instancat heshtin, qytetarët mund të jenë duke konsumuar produkte që nuk dihet se ç’pasoja mund të shkaktojnë në organizmin e njeriut. Po ashtu, një tjetër detaj që vihet re është fakti se nën monitorim po mbahet vetëm zona e Durrësit, edhe pse ka thirrje se e njëjta dukuri ka ndodhur edhe në zona të tjera të vendit.
