Ministria e Bujqësisë nëpërmjet Agjencisë Kombëtare të Veterinarisë dhe Mbrojtjes së Bimëve dhe Institutit për Sigurinë Ushqimore dhe Veterinarinë informon opinionin publik se nuk ka asnjë rast të pranisë së influencës aviare (gripi i shpendëve) në Shqipëri deri më tani.
Sipas njoftimit zyrtar, pas analizave të kryera në tre data të ndryshme dhe me mbi 60 kampione, rezultatet e marra nga mostrat e dërguara nga Agjencia Kombëtare e Veterinarisë dhe Mbrojtjes së Bimëve drejt laboratorit të certifikuar në Institutin për Sigurinë Ushqimore dhe Veterinarinë përjashtojnë kategorikisht sëmundjen virusale të gripit të shpendëve.
Rezultatet e analizimit në laboratorin e referencës konfirmojnë se nuk ka sëmundje që rrezikojnë konsumatorin apo produktet ushqimore me origjinë nga shpendët.
“Ju bëjmë me dije se rastet e dyshuara janë të lokalizuara në vetëm 2-3 stabilimente në një zonë të vetme.
Agjencia Kombëtare e Veterinarisë dhe Mbrojtjen e Bimëve dhe Instituti për Sigurinë Ushqimore dhe Veterinarinë janë në monitorim të vazhdueshëm dhe po bën kontrolle për të verifikuar arsyet e kësaj situatë epizootike”, thuhet në njoftim.
Reagimi erdhi pasi u raportua se qindra mijëra pula kishin ngordhur dhe ishin groposur në Durrës dhe Korçë.
Në Durrës, u raportua se sëmundja Laringotrakeiti ka rënë në masë në pularitë kryesore të qytetit dhe ka shkaktuar ngordhjen e 175.300 pulave.
Pas Durrësit, edhe në qarkun e Korçës dyshohet se sëmundja “Laringotrakeiti” ka rënë në masë tek shpendët në jug-lindje të vendit.
Dyshohet se në total kanë ngordhur në të gjithë vendin rreth 400 mijë pula.
