Rritjen e çmimeve në Shqipëri, ish-Kryeministri Sali Berisha, e konsideron për shkak të spekulimeve të karteleve dhe monopoleve të lidhura me Qeverinë.
Berisha shprehet se ka një rritje shumë të madhe të çmimeve të ushqimeve bazë, duke shtuar se të gjitha këto po ndodhin pa marrë Qeveria asnjë masë të vetme.
“E vetmja masë që morri Edi Rama ishte se njoftoi rritjen e çmimeve, ndërsa spekulantët shfrytëzuan rezervën dhe rritën çmimet, përfshi edhe të atyre që përbënin rezervën”, tha Berisha.
Sipas tij, këto protesta kërkojnë marrjen e masave për zbutjen e pasojave që bien mbi qytetarët.
Berisha tha se regjimi i Edi Ramës mund të rrëzohet vetëm me protesta, pasi është më i keq se edhe ai i Ramiz Alisë.
“Për fatin e keq ky regjim ka mbështetje të habitshme edhe nga Qeveri të ndryshme. Ky është një regjim që ble votat me paratë e drogës, ka ngritur sistemin e patronazhistëve, po shpopullon Shqipërinë, pasi ka vrarë shpresën.
Në shumë vende të BE dhe në Rajon janë marrë masa duke ulur TVSH apo taksa të tjera, me qëllim uljen e çmimeve, ndërsa në Shqipëri Qeveria prezanton një paketë qesharake, që askush nuk e beson”, tha Berisha. Ai tha se mbështet protestat që janë kundër spekulantëve që kanë rritur çmimet në stratosferë, ndërsa ka kërkuar nga qytetarët që të protestojnë për të drejtat e tyre.
Berisha tha se vendi ka një opozitë të vërtetë, e cila do të qëndrojë në krah të qytetarëve që protestojnë me të drejtë. Sipas tij, ka ikur koha e opozitës fasadë, e cila fshihej dhe nuk mbështeste qytetarët.
