Erisa Xhixho në emër të LSI ka denoncuar dhunën policore ndaj qytetarëve që protestojnë prej 4 ditësh.
“Prej katër ditësh, qytetarët protestojnë në të gjithë vendin në mënyrë paqësore sepse janë në varfëri e skamje, sepse nuk përballojnë kostot e jetesës që rriten çdo ditë, sepse nuk duan të largohen nga vendi i tyre, por mbi të gjitha sepse të drejtën e protestës ua jep ligji dhe ata e dinë shumë mirë fuqinë e sovranit.
Policia ka dhunuar në mënyrë cnjerëzore burrat, gratë, nënat dhe të rinjtë, që rritja e menjëhershme e çmimeve i ka detyruar të derdhen në rrugë e sheshe, pasi vetëm prej atje zëri i tyre mund të dëgjohet.
Dhe përballë të drejtës për të protestuar kemi një shtet që reagon me arrestime të paligjshme, me mbajtjen e të rinjve në komisariate të tejmbushura, pa kushtet minimale, shpesh edhe duke i transferuar në qytete të tjera pa dijeninë e prindërve”, tha Xhixho.
Ajo i ka bërë thirrje ministrit të Brendshëm, Bledi Çuçi, dhe drejtorit të Policisë së Shtetit, Gledis Nano, t’i shkarkojnë drejtuesit e policisë që urdhërojnë dhunën, jo në praninë e kamerave. Xhixho iu referua rastit të drejtorit të Policisë së Tiranës, Lorenc Panganika, i cili i kërkonte policëve të mos dhunonin qytetarët në prani të kamerave.
“Nëse nuk janë në gjendje të largojnë këta drejtues policie, le të dorëhiqen vetë”, tha Xhixho.
