Mbledhja e Grupit Parlamentar të PD duket se është mbyllur pa një vendim, ndërsa Lulzim Basha nuk ka pranuar të japë dorëheqjen ashtu sikundër i është kërkuar prej 5 orësh nga shumica absolute e deputetëve që i qëndruan besnik deri me 6 mars.
Nga raportimet mësohet se Basha është shprehur i gatshëm për një zgjidhje, por pa pohuar dorëheqjen, ndërsa ka pranuar se do të ketë negociata.
Nuk dihet se me kë do të bëhen negociatat dhe për çfarë do të bëhen, por duket se Basha ka pranuar tezën që PD të drejtohet nga një grupim deputetësh, përfshi edhe ata që mbështesin ish-Kryeministrin Sali Berisha, për ti hapur rrugën procesit të zgjedhjeve.
Në anën tjetër, Berisha publikisht ka deklaruar se kushti i vetëm që ka është respektimi i votës së lirë, pra do të jetë vota ajo që do të përcaktojë se kush do të drejtojë PD, duke pohuar gjithashtu se do të hyjë në garën për Kryetar.
Gjithsesi ajo që dihet deri tani është se Basha e ka cilësuar si kurth të gjithë këtë situatë dhe pavarësisht deklaratave se është gati të bëjë gjithçka për bashkimin e PD, ai nuk ka dhënë dorëheqjen.
