Çmimi i naftës dhe i benzinës do të jetë 217 lekë për litër deri në datën 15 mars. Bordi kombëtar të administrimit të karburantit ka marrë vendimin pas mbledhjes së parë duke fiksuar në këtë nivel çmimin e karburanteve.
Po ashtu është miratuar edhe çmimi i shitjes me pakicë i gazit për periudhën 12 deri në 15 mars 2022, i cili do të jetë 93 lekë/litri.
Bordi i Transparancës do mblidhet përsëri ditën e martë me qëllim pasqyrimin në çmimin e shitjes me pakicë të këtyre nënprodukteve dhe të ndryshimeve të mundshme të çmimeve në tregjet ndërkombëtare.
Ndërkohë që çdo operator i shitjes me shumicë dhe pakicë është i detyruar të zbatojë Vendimin e Bordit të Transparencës në lidhje më çmimet e shitjes me shumicë dhe pakicë ose në të kundërt do të penalizohen. Kryeministri paralajmëroi se nëse nuk zbatohen vendimet do të rrezikojnë edhe sekuestrimin e pikave të karburanteve nga shteti.
Qeveria mori masa për çmimin e karburanteve pas nisjes së protestave masive në vend ndërsa një litër naftë arriti nivel rekord duke u shitur deri në 270 lekë për litër. Shqipëria aplikon një sërë taksash në një litër naftë dhe në total kosto e tyre arrin deri në 120 lekë për litër.
Aktualisht çmimi i naftës ka filluar të ketë ulje edhe në tregjet ndërkombëtare ku aktualisht një fuçi po shitet me 109 dollarë nga 130 dollarë që ishte disa ditë më parë.
