Kryeministri Edi Rama u shfaq sot i nervozuar nga protestat, por edhe përdori strategjinë e përhapjes së panikut, njëlloj si në rastin e pandemisë. E ndërsa dy dite më parë fliste për armikun e padukshëm që të kapte sa dilje nga shtëpia, ndërsa rrugët i mbushi me blinda dhe makina ushtarake, sot Rama vendosi që të përhapte panik lidhur me çmimin e energjisë që do të duhej të paguante sot një familje shqiptare, që sipas tij, do të ishte 7 herë më e lartë se ajo që paguan.
Madje shkoi më tej, kur tha se në faturën e ardhshme, me përgjegjshmëri do të shkruhej edhe vlera reale, e cila rimbursohet nga Qeveria, si dhe vlera që paguan konsumatori, për të bërë kështu diferencën.
Gjatë një lidhje të drejtpërdrejtë në rrjetet sociale, Rama shfaqet i nervozuar teksa deklaron se opozita po e shfrytëzon këtë mundësi që sipas tij po përdoret për të helmuar popullin.
“Në rajon dhe Europë më thonë është çmenduri financiare, çmenduri është lufta edhe pandemia. Këtij populli i ra edhe një çmenduri tjetër sic ishte tërmeti që na dërmoi të gjithë, prandaj do të rezistojmë qeveria bashkë me ju do të rezistojmë sa të mundemi. Nga nesër ju do të keni transparencën e faturës së energjisë elektrike, aty do të shikoni ndërkohë që sa do të paguani ju dhe sa paguan qeveria.
Gjithmonë pjesën tjetër nuk do tu paguani ju por do ta paguajë qeveria që i kërkohet gjithçka madje i kërkohet edhe gjëra që s’kanë lidhje me demokracinë. Duan apo s’duan ata që gënjejnë dhe sajojnë fakte të paqena. Ngrenë akuza të paskrupullta për të helmuar sa më shumë njerëz dhe për ngrënë helmin”, u shpreh Rama.
Ai tha se nuk mund të trajtohen të gjithë si hajdutë që vjedhin popullin, bashkë me oligarkët. “Unë mund të kem 100 të këqija, por hajdut nuk jam”, tha Rama.
