Deputeti socialist Erion Braçe ka denoncuar se këto ditë ka abuzime me çmimet në të gjithë tregun dhe jo vetëm në atë të naftës. Në një video në Instagram, Braçe shkruan se abuzimi me çmimet e ushqimeve po godet konsumin dhe standardin e jetesës; po godet të varfrit, por edhe të mesmit.
Sipas tij, abuzimi me çmimet e lëndëve të para po godet prodhimin, investimet publike e private. Ai kërkon nga agjencitë dhe institucionet shtetërore që të ndërhyjnë duke bërë inventaret e çdo prodhuesi dhe tregtuesi.
“Është punë dhe duhet bërë tani! Bëhet bashkë me qytetarët që përballen të parët me abuzimin, qeveria, agjencitë ligjzbatuese fiskale, ato me detyra inspektimi të tregut, agjencitë ligjzbatuese që kanë shënjestër krimin ekonomik. Abuzimi me çmimet e ushqimeve po godet konsumin dhe standardin e jetesës; po godet të varfrit, por edhe të mesmit; Abuzimi me çmimet e lëndëve të para po godet prodhimin, investimet publike e private. Përsëris thirrjen: bëni inventarët për çdo subjekt prodhues, tregtues, magazinat e tyre, çmimet! Shkoni në Elbasan sot e shihni se sa hekur ka stok një subjekt atje, tërhequr nga tregu. Do të fitojë para, dakord, por jo kështu, jo kaq shumë. Nuk ka moral! Është krim! Po vrisni ekonominë kombëtare dhe ekonominë familjare. Ndaj duhet të bëhemi bashkë kundër abuzimit me çmimet, ta dënojmë abuzimin,”- thotë Braçe.
