Autori i krimit të katërfishtë në Andraviada në Greqi, ku mbetën të vrarë 4 shqiptarë, mes të cilëve edhe dy fëmijë 18 dhe 30 muajsh, po përballet me drejtësinë, ndërsa Gjykata ka caktuar masën e sigurisë “arrest me burg”.
Autori 60-vjeçar grek ndodhet në burgun e Koridhalos, ndërsa është proceduar penalisht për katër vrasje me dashje dhe armëmbajtje pa leje.
Mediat greke e cilësojnë si “kasapi i Andarviadës”, ndërsa në seancën që zgjati 4 orë nuk foli për vrasjen makabre të dy fëmijëve të vegjël të familjes shqiptare, shkruan protothema.gr.
Pavarësisht këmbënguljes së hetuesve ai nuk tha asgjë për fëmijët.
Ai ka pranuar se ka vrarë 32-vjeçarin shqiptar dhe bashkëshorten e tij 37-vjeçare. Ai ka dhënë detaje mbi shkakun e vrasjes.
Ai tha se nga mbrëmja tragjike mban mend se është përleshur më çiftin shqiptar dhe se ka qëlluar me armë. Që nga ai moment ai nuk mban mend asgjë.
Përtej kësaj, 60-vjeçari thotë se nuk mban mend asgjë tjetër, as për vrasjen e fëmijëve dhe as për kufomat që u gjetën të vendosura në një rimorkio në oborrin e shtëpisë. Për shkaqet, ai pohoi se nuk ishte mosmarrëveshja për qiranë dhe skadimi i kontratës, por sjellja e çiftit shqiptar ndaj nënës së tij.
Armando, 32 vjeç dhe Maria Kloci, 37 vjeç, së bashku me dy fëmijët e tyre, 1.5 dhe 2.5 vjeç, u vranë në shtëpinë e tyre të mërkurën e kaluar në Andravidë.
