Lulzim Basha ka thirrur një mbledhje të Kolegjit të Kryetarëve, ku përfshihen drejtuesit e degëve të PD, një pjesë e të cilëve janë emëruar në këto pozicione, pasi shkarkoi ata që ishin rrjeshtuar në krah të ish-Kryeministrit Sali Berisha.
Mbledhja pritet të mbahet në selinë e PD, në orën 17:00.
Kjo mbledhje e Bashës, vjen një ditë pas asaj me grupin parlamentar të PD-së, ku shumica e deputetëve kërkuan largimin e tij nga drejtimi i partisë.
Në mbledhjen e Grupit Parlamentar Basha u mbrojt nga deputetët Kreshnik Çollaku, Arbi Agalliu, Flamur Hoxha dhe Oriola Pampuri, ndërsa neutralë në debatin e zhvilluar qëndruan Gazment Bardhi dhe Enkelejd Alibeaj.
Ndërkohë 18 deputetë, që konsideroheshin si mbështetës të flaktë të Bashës në përballjen që për muaj pati me ish-Kryeministrin Sali Berisha i kanë kërkuar të dorëhiqet dhe ti hapë rrugën bashkimit të demokratëve.
Të parët që kërkuan që kreu i Partisë të mbante përgjegjësi për zgjedhjet e 6 Marsit ishin nënkryetarët e emëruar po nga ai, Agron Gjekmarkaj dhe Grida Duma, madje e bënë këtë dhe publikisht jashtë dyerve të blinduara të Partisë Demokratike.
Nuk dihet nëse drejtuesit e degëve të PD do të kenë kurajon që ti kërkojnë Bashës të largohet, por 6 prej atyre që sot do të jenë në takim, dhe që i përkasin degëve të PD në Bashkitë ku në 6 mars u zhvilluan zgjedhjet, janë humbës, bashkë me shumë prej deputetëve, që u angazhuan në fushatë, madje edhe si drejtues politik të saj.
