Milani arriti një fitore shumë të rëndësishme në përballjen me Napolin në transfertë, për t’u rikthyer sërish në kreun e renditjes dhe për të besuar akoma më shumë te titulli.
Sfida nisi me një ritëm të ulët në pjesën e parë, kur të dyja skuadrat nuk prodhuan shumë raste, por luajtën të mbyllura. Gjithashtu Milani pati dhe një pretendim për një penallti me Benaser, por Orsato nuk e pa si të tillë.
Vetëm tre minuta pas fillimit të pjesës së dytë, Kalabria lëshoi një goditje nga jashtë zone dhe Zhirud e devijoi për ta dërguar topin në rrjetë.
Më pas Napoli u mundua të reagonte, por mbrojtja e Milanit ishte mirë e vendosur për të mos pësuar.
Kështu Milani ngjitet sërish në vendin e parë, ndërkohë që Napoli qëndron në vendin e tretë.
