Kandidati i Shtëpisë së Lirisë në Dibër, Premtim Kryemadhi, ka denoncuar deputetin Xhelal Mziun, duke thënë se po intimidon votuesit.
Deklaratën e bëri në një prononcim për gazetarët, pas votimit te shkolla “Demir Gashi”, Peshkopi.
“Ju vlerësoj për punën që bëni. Falenderimi i parë i shkon Zotit. Por dua të falënderoj të gjithë qytetarët që marrin pjesë në votime. Kushtet e vështirësuan pak, por u bëj thirrje që të dalin të gjithë dhe të shprehin mendimin e tyre. Vota e tyre është forcë. Nga informacionet e para që kam, procesi vazhdon. Është pak problem pjesëmarrja. Megjithatë mendoj se qytetarët do ta mbështesin këtë proces”, tha Kryemadhi.
“Kam një apel për administratën qendrore dhe lokale, si dhe për deputetët që janë këtu, u bëj thirrje që t’i lënë qytetarët të lirë të votojnë, t’i lënë shantazhet. E gjithë administrata e Bashkisë së Kamzës kanë qenë sot këtu. Edhe tani që flasim, kam një mesazh nga një deputet që bën thirrje se kë duhet të votojmë. Deputeti është i Bashës. Ai është Xhelal Mziu. Besoj se nuk do intimidohen qytetarët nga ky presion. Sot është heshtje zgjedhore që duhet respektuar. Besoj se qytetarët nuk do ndikohen nga ky presion dhe do të shkojnë te qendrat e votimit”, shtoi Kryemadhi.
