Health Consumer Powerhouse ka publikuar indeksin më të fundit për shpenzimet në shëndetësi.
Për të kuptuar sesi klasifikohet Shqipëria në krahasim më vendet e tjera europiane, përfshirë 28-tëshen e Bashkimit Evropian, mjafton të shohësh kopertinën e raportit, ku vendi ynë ngjyroset me të kuqe.
Kur bëhet fjalë për pagesat nën dorë në shëndetësi, Shqipëria është e para. Të gjithë të anketuarit deklarojnë se japin shpeshherë ryshfet. Në këtë drejtim, Shqipëria lë pas jo vetëm fqinjët të gjithë me radhë, por edhe ka një diferencë të theksuar me të gjitha vendet e marra në analizë, siç duket mjaft mirë edhe nga ky grafik.
Një ditë më parë, një raport i Bankës Botërore pohonte të njëjtën gjë. Edhe sa i përket barnave të rimbursueshme, Shqipëria nuk performon mirë. Vendi ynë është i treti në Evropë, si vendi ku shteti paguan normën më të ulët të barnave të shitura, në rreth 25%.
Shqipëria është vendi që ka edhe më pak mjek për frymë në të gjithë kontinentin, rreth 120 për 100 mijë banorë. Në terma të përgjithshëm, në indeksin e këtij viti, Shqipëria renditet e 32-ta ndër 35 shtete.
Vendi ynë është përfshirë në këtë indeks me kërkesë të vetë Ministrisë së Shëndetësisë. Vetëm Rumania, Bullgaria dhe Mali i Zi janë më keq se vendi ynë. Shqiptarët janë gjithashtu të fundit në Evropë sa i përket shpenzimeve për frymë për shëndetin, vetëm 600 dollarë.
Por, raporti vë në dukje faktin se thuajse gjysma e këtyre parave janë kosto hospitalizimi, pra të shtrimit dhe kurimit të pacientit në spital.
Një tjetër nën-indikator mat raportin publik/privat në totalin e shpenzimeve për kujdesin shëndetësor, dhe për Shqipërinë ky raport fiksohet në 50 me 50, duke e bërë vendin e tretë në Evropë me një disproporcion të tillë, ndërkohë që në vendet e Evropës së zhvilluar pjesa dërrmuese e shpenzimeve i takon shtetit, në mbi 80%. /Televizioni Scan/
