Ish-Kryeministri sali Berisha i ka bërë thirrje qytetarëve të Durrësit që me votën e tyre me 6 mars të mbrojnë historinë dhe të ardhmen e tyre, por edhe të shqiptarëve.
“Vota juaj me 6 mars nuk është vetëm për Ardian Mukën, por keni një rast epik për të mbjellë shpresë në çdo zemër shqiptare, keni një shans të jashtëzakonshëm për të hapur dyert e zgjedhjeve të parakohshme parlamentare, në mënyrë që Shqipëria të çlirohet nga narko-shteti dhe mafia qeveritare”, tha Berisha.
Ai akuzoi Kryeministrin Edi Rama se me një plan mafioz synon grabitjen e 820 mijë metra katror në Portin e Durrësit.
Berisha tha se sot Europa është në luftë, diktatori gjakatar i Kremlinit, po vret njerëzit e lirë në Ukrainë, sot Shqipëria është anëtare e NATO-s dhe këtu e anëtarësoi qeveria e Partisë Demokratike.
“Mos e harroni kurrë, Edi Rama protestonte në atë kohë me portretet e Enver Hoxhës, ndaj me 6 mars votoni për të ardhmen europiane të Shqipërisë”, tha Berisha.
Duke u ndalur te kandidatja Emirjana Sako, ish-Kryeministri tha se në rrafshin human ajo nuk ka të drejtë të kërkojë votat, pasi ka një moral, sepse firma e Sakos ndodhet në dhjetra dokumente në të cilat shkruhej se tërmeti i shtatorit nuk shkaktoi ndryshime në strukturat e ndërtesave, të cilat u shembën me tërmetin e 26 nëntorit 2019.
Berisha tha se në aferën e djegësve, ku përfshihen nga Edi Rama, Engjëll Agaçi, Damian Gjiknuri, Arben Ahmetaj, Erjon Veliaj, Lefter Koka, etj, është e përfshirë edhe zonja Sako, e cila ka firmën te dokumenti i 10 mln eurove, që i paguhen djegësit të Sharrës, që është miniera e floririt për Ramën dhe ministrat e tij.
Sipas tij, kjo është arsyeja sepse Sako ia mbathi nga Komisioni Hetimor parlamentar, sapo iu bë pyetja e parë, sepse po të përgjigjej do të dilte e implikuar në aferën e djegësave. Berisha i bëri thirrje qytetarëve që të mos votojnë Sakon, e cila mendon se si të pasurohet Edi Rama.
Lidhur me kandidimin e Luan Hotit, Berisha u shpreh se ai zgjodhi një humbës të pashpresë, i cili është kampion i humbjeve në 30 vite.
“Dy gjëra nuk të falen Luan Hoti: së pari nuk të falet monopoli, u ktheve nga demokrat në monopolist. Ne jemi parti e biznesit, por jemi anti-monopol, monopoli është biznes korruptiv me qeverinë. Ti Luan si demokrat ke shkelmuar programin e PD-së.
Së dyti nuk mund të të le pa të thënë, se Spartak Braho, me porosi të Edi Ramës, bën fushatën për Lulzim Bravën. Këtu kemi shkëputur të gjitha lidhjet, ndaj dhe të gjithë demokratëve u them: asnjë votë për Lulzim bravën, asnjë votë për Luan monopolin, votoni Ardian Mukën”, tha Berisha.
