Mediat ukrainase raportuan këtë të Mërkurë se një nga skenarët e Vladimir Putin është rikthimi në krye të Ukrainës i Viktor Janukoviç. Viktor Janukoviç është ish-Presidenti i Ukrainës i larguar nga vendi drejt Rusisë si rezultat i “revolucionit portokalli”.
Yanukovych i cili cilësohet si i preferuar i Putinit, ka qenë presidenti i katërt i Ukrainës nga viti 2010 deri në rrëzimin e tij nga pushtetit pasi refuzoi të nënshkruante marrëveshjen e Asosacionit të Ukrainës me Bashkimin Europian.
Më parë ai ka qenë edhe kryeministër i Ukrainës, në periudhën 2002-2005 dhe 2006-2007.
Më 11 prill 2017, një gjykata në Ukrainë njoftoi çeljen e një procesi gjyqësor me akuzën e “tradhtisë ndaj Atdheut” kundër ish-Presidentit të Ukrainës, Viktor Janukoviç.
Sipas një raportimi të kohës, së gjermanes “DW”: Ish-Presidenti Viktor Janukoviç është akuzuar se ka mbështetur veprime, të cilat kishin si synim që të ndryshonin territorin shtetëror dhe kufijtë shtetërorë të Ukrainës. Më tej, Janukoviçi është akuzuar se ka dhënë ndihmë për agresion. Në faqen e internetit të Prokurorisë së Përgjithshme të Ukrainës, është raportuar se Janukoviçi “ka kryer tradhëti ndaj atdheut, pasi ka ndihmuar Federatën Ruse dhe përfaqësuesit e saj, që të cënojnë sovranitetin dhe integritetin territorial të Ukrainës”. Në këtë kuadër ai kishte pasur shpresë se do të merrte mbështetje dhe mbrojtje nga institucionet e Federatës Ruse. Ai ka dashur të qëndrojë për një kohë të gjatë në këtë vend, për t’i shpëtuar përndjekjes penale në Ukrainë.
Viktor Janukoviç është akuzuar edhe për “çështjen Maidan”, hetim që u hap për të gjetur se kush ka dhënë urdhër midis nëntorit 2013 dhe shkurtit 2014 për të përdorur dhunë joproporcionale kundër pjesëmarrësve në protestat masive dhe për të përdorur armë zjarri. Në një rast tjetër, kundër Janukoviçit ka pasur dyshime se ka krijuar një organizatë kriminale dhe e ka drejtuar atë, me synimin që të kryhen krime të rënda ose veçanërisht të rënda.
Viktor Janukoviç u arratis nga Ukraina në vitin 2014 pas protestave masive disamujore gjatë së cilave u vranë mbi 100 ukrainas – të quajtur “revolucioni portokalli”.
Protestuesit ishin kundër qëndrimit të Janukoviç – i cili u afrua me Moskën e drejtuar nga Vladimir Putin dhe u largua nga BE.
