Një nga brigadat e ushtrisë ukrainase po forcohet në periferi të Horlivka-s, në rajonin Donetsk, i cili është nën kontrollin e “pushtuesve” që nga viti 2014 dhe planifikon të zhvillojë një ofensivë, konfirmoi zyra e Presidentit ukrainas.
“Shumica e njësive tona mbajnë pozicionet e tyre, dhe një nga brigadat tona madje përparoi në periferi të Horlivka-s. Tani ata po forcohen atje dhe mund të zhvillojnë një ofensivë. Për herë të parë në shtatë ditë lufte njësitë tona kaluan në një ofensivë në një drejtim të veçantë. Unë mendoj se kjo nuk është ofensiva e fundit, as kundërsulmi i fundit. Së shpejti do të vijë koha kur ne do ta çlirojmë tokën tonë, jo thjesht do ta mbrojmë atë”, tha Këshilltari i Shefit të Zyrës së Presidentit, Oleksiy Arestovych, në një konferencë.
Arestovych gjithashtu informoi se ushtria ruse vazhdon të përqendrojë përpjekjet dhe grupet e saj në drejtimin veri-perëndimor të Kievit për të zhvilluar një ofensivë në kryeqytetin ukrainas.
Megjithatë, ai siguroi se për shkak të punës sistematike të Forcave të Armatosura, sulmuesit nuk do të mund ta bëjnë.
