Një padi pritet të depozitohet në SPAK këtë të Martë për kryebashkiaken e Durrësit Emiriana Sako, lidhur me çështjen e inceneratorëve. Lajmin e konfirmoi deputetja demokrate Ina Zhupa.
Në një deklaratë nga selia blu, Zhupa shpjegoi skemën sipas saj korruptive e mafioze në Durrës, për të cilën tha se ka përgjegjës direkt Emiriana Sakon dhe Alqi Bllakon.
“Znj.Sako u paraqit në komisionin hetimor për inceneratoret dhe nuk arriti dot që ti përgjigjej pyetjeve të komisionit dhe u largua pa dhënë përgjigjet, që kishin nevojë qytetarët e Durrësit dhe gjithë shqiptarët. Sigurisht që edhe refuzimi për t’iu përgjigjur pyetje edhe kjo është pjese e padisë penale”, tha Zhupa, duke iu referuar seancës në komisionin hetimor, kur Sako u largua pa iu përgjigjur të gjitha pyetjeve të deputetëve.
“Skema mafioze e menaxhimit të mbetjeve në qytetin e Durrësit ka nisur në datën 10.07.2018 me vendim numër 537 të Këshilli Bashkiak të Durrësit, i cili i drejtohej Komitetit të AKUM për shpalljen e gjendjes së emergjencës dhe gjetjen e zgjidhjes për sa i përket mbetjeve në qytetin e Durrësit, ku ishte evidentuar dhe me pas mbyllja e Porto Romanos dhe nevojës për të depozituar mbetjet e qytetit të Durrësit në një qytet tjetër, deri në 10.06.2019, nuk është bërë asgjë. Një vit e gjysmë që Emiriano Sako me veprimet dhe mosveprimet e saj, ka çuar Durrësin drejt një katastrofe mjedisore, duke mirëmenduar që kjo t’i shërbejë aferës se inceneratoreve”, u shpreh Zhupa.
Dje, për çështjen e inceneratorëve u depozitua kallëzim në SPAK për kryebashkiakun e Tiranës, Erion Veliaj.
