Aeroporti në qytetin Zhytomyr është goditur pasditen e së dielës nga raketa Iskander, të cilat dyshohet të jenë lëshuar nga territori i Bjellorusisë.
Lajmi është bërë i ditur nga Anton Herashchenko, këshilltari i ministrit të Brendshëm të Ukrainës, raporton BBC, i cili publikoi fillimisht një video në FB ku pretendonte se pak pasi Ukraina kishte pranuar të negocionte me Rusia, raketat ishin lëshuar nga shteti fqinj.
Ai shkroi sërish në rrjetet sociale duke theksuar se raketat kanë përfunduar në aeroportin e qytetit Zhytomyr. Gjithashtu publikoi dhe pamje nga shpërthimi.
“Kjo është ajo që është goditur nga Iskanderët e gjuajtur nga Bjellorusia rreth orës 17:00… fashistët rusë dhe bjellorusë kanë vënë në shënjestër Aeroportin Zhytomyr”, postoi Anton Herashchenko në “Telegram”.
Zyrtarët ukrainas dhe ata rusë pritet të mbajnë një takim mëngjesin e së hënës në kufirin mes Bjellorusisë dhe Ukrainës.
