Ronela Hajati do përfaqësojë vendin tonë në Eurovision me këngën “sekreti.” E ftuar në Why?Not, artistja tregoi përgatitjet që po bën për të marrë pjesë në Eurovision.
“E kam pasur me qejf që fëmijë. Ne jemi ai brezi që jemi rritur me Eurovision. E shihnim dhe e ëndërronim si gjë të paarritshme asnjëherë, por ja që erdhi dita që dhe Shqipëria të ishte pjesë e Eurovision, të nxirrte këngë shumë të bukura dhe tani është radha ime. Janë shumë etapa, shumë gjëra që i kam mbi kurriz që duhet t’i bëj patjetër edhe akoma nuk e kam ndjerë plotësisht kënaqësinë e të shijuarit të gjësë sepse janë projektet që duhen mbaruar në kohë rekord. Klipi sapo ka përfunduar.
Xhirimet janë bërë në Bylis dhe në Kalanë e Gjirokastrës. Ishte një i ftohtë i tmerrshëm që në Kala ishte edhe më ftohtë se sa jashtë. Ngrohëse nuk bënte asnjë lloj punë sepse ishin dritaret e hapura, unë rrija me një tharëse flokësh gjatë gjithë kohës. Kishim xhirime edhe jashtë, unë kisha një fustan shumë të hollë, binte dhe shi. Jemi çuar që në orën 03:00 të mëngjesit për xhirime. Kemi kaluar 3 ditë pa gjumë dhe kur mbaruam kam fjetur 18 orë. Nuk dija në çfarë dite u zgjova. Ka qenë një punë intensive dhe shumë e këndshme. Ishte një organizim i mrekullueshëm.”- tregoi Ronela.
