Pavarësisht deklaratave publike dhe akuzave të forta të Ylli Manjanit në dokumentin zyrtar të shkarkimit të tij nga kryeministri Edi Rama thuhet se ai po lirohet për çuarjen përpara të reformës në drejtësi.
Televizioni Klan ka siguruar edhe motivacionin e shkarkimit të Ylli Manjanit dhe zëvendësimin e tij me Petrit Vasilin. Në shkresën e firmosur nga Kryeministri Edi Rama thuhet:
“Në funksion të përmirësimit të mëtejshëm të cilësisë së bashkëqeverisjes dhe të koordinimit sa më të mirë të punës me Kuvendin, aktorët e tjerë shoqërore e grupet e interesit, për çuarjen përpara të Reformës në Drejtësi, kam gjykuar të nevojshëm lirimin e Ministrit Manjani dhe zëvendësimin e tij me Ministrin Vasili”.
Ky vendim vjen pas një situate të tensionuar në gjirin e koalicionit qeverisës gjatë fundjavës, për shkak të disa deklaratave të forta të përfaqësuesve të LSI-së kundër punës së qeverisë apo eksponentëve lokal socialistë
Gjatë ditës së sotme Kryeministri u takua fillimisht me kryetarin e parlamentit Ilir Meta, njëkohësisht dhe kryetar i LSI-së, Ilir Metën. Më pas ky i fundit thirri në zyrën e tij Manjani.
Ylli Manjani, u emërua në fund të vitit 2015. Ai është ministri i tretë i LSI-së që largohet nga qeveria, pas ish-ministrit të Drejtësisë Nasip Naço dhe më pas të ish ministrit të Transporteve Edmond Haxhinasto. /TV Klan/
