Shtyhet përsëri rikthimi në fushë i Zlatan Ibrahimovic. Sulmuesi i Milanit, i cili është i dëmtuar prej më tepër se një muaji, vazhdon të punojë i diferencuar. Problemi në thembër vazhdon ta shqetësojë dhe për këtë arsye, ai po kryen stërvitje të personalizuar në Milanello.
Edhe pse ndihet disi më mirë, Ibrahimovic nuk do të jetë gati për duelin e së premtes me Udinese-n në San Siro. Objektivi real i vendosur nga sulmuesi është të luajë në derbin e Kupës së Italisë përballë Interit.
Prej disa ditëve, 40-vjeçari poston video të stërvitjeve, nga forca në palestër e deri të puna në fushë në orët e vona në natës, kur të gjithë flenë. Sinjale që po punon shumë, për të zbritur në fushë më 1 mars. Ai është synimi i Zlatan dhe dëshira e të gjithë tifozëve.
Data e rikthimit dhe ndeshja nuk janë përzgjedhur rastësisht. Ibrahimovic ka qenë gjithmonë protagonist në derbin e Madonina-s dhe është në gjendje që të entuziazmojë tifozët vetëm me prezencën në fushë.
Prej lëndimit ndaj Juventusit, sulmuesi do të ketë humbur pesë ndeshje. Por, fakti që ka vendosur si afat sfidën me Interin, tregon se Ibra dëshiron të thotë fjalën e tij, për të rikuperuar mungesën në derbin e fundit, ku Milani fitoi edhe pa të në fushë.
