Mbërritja në brigjet e Sardenjës e emigrantëve klandestinë, edhe pse “më pak e dukshme se pikat e tjera italiane të zbarkimit është një fenomen që meriton vëmendje sidomos kur shumë prej tyre rekrutohen në punë kriminale. Në një raport të Antimafias italiane theksohet se si rekrutohen emigrantët, kryesisht ata shqiptarë dhe nigerianë në organizatat kriminale.
Sipas dokumentit, krimi shqiptar operon më shumë në trafikimin ndërkombëtar të drogës. Kjo është evidentuar edhe gjatë goditjeve të policisë italiane kryesisht ndaj mafies italo-shqiptare e dedikuar për trafikun ndërkombëtar, mbajtjen dhe trafikimin e lëndëve narkotike. Organizata kriminale importonte sasi të mëdha kokaine nga Shqipëria për trafikimin e saj në Costa Smeralda. Po në këtë fushë veprojnë edhe organizatat nigeriane dhe kolumbiane, shkruajnë mediat italiane.
Nigerianët janë aktivë në trafikun e drogës sepse ata kanë “kanale furnizimi si në Afrikë ashtu edhe në pjesën tjetër të vendit” dhe mund “të përdorin korrierë që transportojnë drogën e paketuar mes vezëve”. Këto janë evidentuar në operacionet e fundit të zhvilluar nga policia italiane ndaj mafias nigeriane ku u arrestuan 37 nigerianë dhe dy italianë, pjesë të një organizate që tregtonte heroinë dhe kokainë e ardhur nga Malajzia përmes Holandës.
Mafia nigeriane dhe ajo shqiptare, në narkotrafikun dhe prostitucionin
Puna kryesore është trafikimi i qenieve njerëzore për shfrytëzim prostitucioni, lypje, zhvatje e shtetasve afrikanë dhe trafiku i drogës. Nigerianët bashkëpunojnë me grupet kriminale shqiptare”, në falsifikimin e dokumenteve, të parave, në mashtrimet kompjuterike, krimet kundër personit dhe pronës. Ka nga ata që komandojnë, por edhe ata që janë anëtarë të thejshtë. Të ashtuquajturat “kulte sekrete” karakterizohen nga organizimi hierarkik, si një strukturë paraushtarake, nga kodet e sjelljes të përcaktuara si “mafia”.
