NGA OlSJAN TOPALLI*
Jo më pak se 25 vite që me rrëzimin e sistemin komunist dhe me hyrjen e demokracisë, me rininë shqiptare po abuzohet masivisht nga politika shqiptare.
Shumë prej të rinjve e shikojnë Shqipërinë me një pesimizëm të lartë shoqëror dhe si shpresë të tyre të vetme shikojnë politikën duke u bërë pjesë e anëtarësisë së tyre, me shpresën se një ditë qeveritarët sëbashku me politikën e tyre do jenë në anën e tyre. Premtimet janë të shumta, duken kaq të vërteta dhe reale mbushur me një dozë të madhe shprese dhe optimizmi nga ata që janë në pushtet por edhe ata të cilët pretendojnë të marrin pushtetin.
Nga vetë emri “Rini” kjo shoqërohet me energji, pasion dhe ide të reja, ku disa prej tyre në prag fushatash zgjedhore u premtohen nga shefat e tyre se emri i tyre do të shënohet në lista për deputetë, anëtarë këshilli apo dhe poste të tjera të rëndësishme politike. U premtohet një e ardhme e mirë, u premtohet mbështetja e tyre absolute dhe e pakontestueshme dhe këtu ‘servilizmi’ arrin ne nivele të larta me të drejtë. U servilosen ‘idhujve’ të tyre duke u shfrytëzuar nga ato me shpresën se diçka e mirë i pret në ditët në vijim.
Bëhen pjesë e partive politike, por asnjëherë nuk diskutojnë për realitetin, për të ardhmen, për të mirat që mund ti sillen këtij vendi, rinisë. Por, edhe takimet që bëjnë me shefat e tyre, i bëjnë nëpër kafene, e diskoteka. Kaq u mjafton kësaj rinie për tu gënjyer pas gotave mbushur me alkool dhe të ndërtojnë ëndrrat e tyre mbushur me fantazi…
Nuk mjafton vetëm kjo sepse ka dhe nga ato të cilët kanë frigoriferin bosh, u mungon ushqimi, buka, u mungojnë gjërat më minimale jetësore. Por, kjo nuk u intereson shumë, mjafton të merren me pak politikë dhe të bien pre e premtimeve boshe që u bëhen nga eprorët ‘engjëllorë’ të cilët edhe premtimet i kanë të tilla.
Me të mbaruar fushata dhe zgjedhjet, aty kuptojnë që s’ka ndryshuar asgjë. Askush s’u hap dyert, askush s’u ngre telefonin, askush si përshëndet në rrugë, askush s’do t’ia dijë, thua sikur s’u njohën fare. Aty ata njihen me zhgënjimin për të disatën herë dhe kuptojnë që ato ëndrra të kurdisura plot dëshirë e pasion thyhen pas zgjedhjeve politike.
Aty kuptojnë që vendi tyre s’është për ta dhe ashtu të dëshpëruar marrin rrugët e emigracionit për një jetë më të mirë larg premtimeve boshe të politikanëve tanë. Shumë të rinj janë larguar, mijëra të tjerë po e mendojnë sepse politika nuk ofron asgjë pozitive për ta, përveç ëndrrave që ato thurin.
(Boldnews)
